Ky është momenti kur një person i armatosur vrapon pranë agjentëve të Shërbimit Sekret dhe hap zjarr në hotelin ku mbahej darka e korrespondentëve të Shtëpisë së Bardhë, ku ishte i pranishëm edhe Donald Trump. Cole Tomas Allen, 31 vjeç, po përballet me akuza për armëmbajtje dhe sulm pasi u arrestua në Uashington. Trump postoi një video drithëruese në Truth Social ku shfaqet i dyshuari duke hapur zjarr. Pamjet bardh e zi të kamerave të sigurisë tregojnë stafin që qëndron jashtë dhomës së ngrënies ku po zhvillohej eventi prestigjioz. Një anëtar i stafit me kostum dhe kravatë shihet duke u mbështetur në një karrige duke kryqëzuar këmbët, i pavetëdijshëm për kaosin që po zhvillohet. Një burrë më pas hyn papritur në sallë duke vrapuar me shpejtësi dhe duke hapur zjarr. Dy agjentë të Shërbimit Sekret mund të shihen më pas duke nxjerrë armët e tyre dhe duke qëlluar në drejtim të “atentatorit të mundshëm”. Një tufë oficerësh me armë mbushën më pas sallën. Trump u evakuua nga eventi nga agjentët e Shërbimit Sekret, ndërsa të ftuar të tjerë të tmerruar u fshehën nën tavolina në Ëashington Hilton.