Aeroplanmbajtësja franceze Charles de Gaulle u nis të mërkurën drejt Detit të Kuq për t'u përgatitur për një mision të mundshëm për të rikthyer lundrimin e lirë në Ngushticën e Hormuzit, tha Parisi. Ky veprim kishte për qëllim të dërgonte "një sinjal se jo vetëm që jemi gati të sigurojmë Ngushticën e Hormuzit, por edhe se jemi të aftë ta bëjmë këtë", u tha gazetarëve një ndihmës i Presidentit Emmanuel Macron. Trafiku në rrugën ujore strategjike, përmes së cilës kalon normalisht rreth një e pesta e naftës bruto në botë, është ndalur pothuajse plotësisht që kur shpërtheu konflikti në Lindjen e Mesme në fund të shkurtit. Makron dhe kryeministri britanik Keir Starmer po udhëheqin një mision shumëkombësh drejt rikthimit të lirisë së lundrimit në Ngushticën e Hormuzit, që ata thonë se do të jetë tërësisht mbrojtës dhe do të nisë vetëm pasi të mbarojë lufta. Makron shkroi në X se i kishte transmetuar homologut të tij iranian Masoud Pezeshkian të mërkurën "shqetësimin e tij të thellë" për përshkallëzimin në rajonin e Gjirit mes ngecjes së bisedimeve të paqes. "Të gjitha palët duhet ta heqin bllokadën e ngushticës, pa vonesë dhe pa kushte", tha ai në X, duke iu referuar bllokadës amerikane të porteve iraniane dhe kontrollit të vetë Teheranit në rrugën jetike detare. Aeroplanmbajtësja Charles de Gaulle, anija kryesore e marinës franceze, dhe anijet që e shoqërojnë atë po kalojnë tranzit nëpër Kanalin e Suezit në rrugën drejt Detit të Kuq, tha ministria franceze e mbrojtjes. Aeroplanmbajtësja ka rreth 20 avionë luftarakë Rafale në bord dhe shoqërohet nga disa fregata.