Kryeministri Edi Rama e konsideron debat bosh dhe abuzim me lirinë e fjalës nga dëshpërimi këmbënguljen e akuzave të opozitës për çështjen “McGonigal”. Partia Demokratike thirri këtë të enjte në interpelancë kreun e Qeverisë në lidhje me hetimet e nisura ndaj ish-zyrtarit të lartë të FBI-së nga autoritetet amerikane. Rama delegoi interpelancën te Spiropali, ndërsa përmes bllokimit të foltores, deputetët e opozitës kërkuan praninë e Kryeministrit. Kreu i Qeverisë iu përgjigj përmes rrjeteve sociale. Ai thotë se të gjitha skenat në Parlament janë një abuzim total me lirinë e fjalës, me të vërtetën, me publikun në një dëshpërim total moral, politik, elektoral, ku me shpifje ekstreme synohet manipulimi i opinionit me një çështje të hetuar nga drejtësia amerikane që ka shkuar në gjykatë e që s’ka asnjë lloj lidhje me ne këtu!