Një gomone me rreth 130 persona në bord u gjet e përmbytur në gjirin e libisë, por asnjë person nuk u gjet në të nga ekipet e shpëtimit që mbërritën në vendngjarje. 10 trupa të pajetë u gjendën pranë anijes së përmbytur. që nga fillimi i vitit mbi 350 persona kanë humbur jetën në rajonin e mesdheut qëndror. Asnjë person nuk është gjetur në një gomone që mendohet të ketë patur rreth 130 persona në bord dhe që u gjet e përmbytur në gjirin e Libisë, ka thënë organizata për ndihma SOS Mediterranee, më 22 prill. Anija e kësaj organizate ka kërkuar zonën ku ka ndodhur incidenti, në verilindje të Tripolit, dhe ka gjetur të paktën 10 trupa. “Prej kur kemi arritur në zonë, ne nuk kemi gjetur të mbijetuar dhe kemi parë të paktën 10 trupa në afërsi të anijes”, ka thënë Luisa Albera, koordinatore në këtë organizatë. Sipas saj, organizata ka pasur vështirësi që të organizojë ekipet e shpëtimit, pasi është raportuar për tri anije në ujërat ndërkombëtarë të Libisë. Më 21 prill, organizata ka dështuar të gjejë një varkë prej druri me 40 persona në të. Javën e kaluar, të paktën 41 persona kanë vdekur kur një anije migrantësh është përmbytur në gjirin e Tunizisë. Vetëm deri në këtë periudhë të vitit, më shumë se 350 persona kanë humbur jetën në rajonin e Mesdheut Qendror, pa përfshirë vdekjet e fundit, tregojnë të dhënat e Kombeve të Bashkuara. Libia është vend i madh transit për shumë migrantë afrikanë, të cilët synojnë të kalojnë Mesdheun, për të arritur në Evropë.