Konferenca e Kryetarëve e mbledhur mengjesin e se merkures ka marre vendimin per shtyrjen e punimeve te seances plenare edhe pas krishtlindjeve, nderkohe qe sipas kalendarit të punimeve, seanca e fundit e Parlamentit për këtë vit ishte përcaktuar 17 dhjetori. " Mbledhja shqyrtoi dhe miratoi Planin e Veprimit për zbatimin e rekomandimeve të raportit të Komisionit Europian për vitin 2020 dhe kalendarin e punimeve të Kuvendit për periudhën 21-25 dhjetor 2020", thuhet në njoftimin për median nga kuvendi. Në fillim të mbledhjes, Kryetari i Kuvendit, Gramoz Ruçi, ka nënvizuar se “Plani i Veprimit që shyrtojmë sot është një dokument shumë i rëndësishëm sepse përmban gjetjet, rekomandimet, sfidat dhe masat konkrete për përshpejtimin e procesit të integrimit europian.” Mesa duket mungesa e një ministri të Brendshëm në Shqipëri ka shkaktuar shtyrjen e punimeve të Parlamentit. Sakaq kryeministri ka bërë të ditur se brenda ditësh mund të dërgojë emrin në presidencë për ministër të Brendshëm, ndërsa Parlamentit i duhet të presë të paktën mbi 15 ditë për dekretin e kreut të shtetit. Precedentët e mëparshëm me dekretet për ministra, ku Meta i ka refuzuar apo i bllokuar, duket se ka detyruar mazhorancën që të mos mbyllë punimet e Parlamentit.