Pakistanezët e sfiduan motin e ftohtë dimëror për të votuar në zgjedhjet parlamentare të enjten, në një kohë kur dhuna është duke u rritur, së bashku me telashet ekonomike dhe politike. Votimi, i cili filloi në orën 8 të mëngjesit sipas kohës lokale, po mbahet një ditë pasi së paku 30 njerëz u vranë nga dy shpërthime të ndërlidhura me zgjedhjet në provincën Balochistan në jugperëndim të Pakistanit dhe në një kohë kur inflacioni ka arritur gati në 30 për qind dhe ish-kryeministri, Imran Khan, politikani më i njohur në vend, është në burg. Më shumë se 650.000 ushtarë, policë dhe paramilitarë janë angazhuar për ruajtjen e rendit gjatë këtyre zgjedhjeve. Sondazhet kanë parashikuar një dalje të vogël në zgjedhje në vendin ku 128 milionë njerëz kanë të drejtë vote, për shkak të pengimit të partisë së Imran Khan dhe dy shpërthimeve të mërkurën, të cilat ndodhën pranë zyrave të kandidatëve. Përgjegjësinë për këto sulme e mori Shteti Islamik. Autoritetet ngulën këmbë se dhuna nuk do ta ndalte mbajtjen e zgjedhjeve. “Çdo përpjekje për të sabotuar situatën e paqes dhe sigurisë do të parandalohet”, tha kryeministri në detyrë i Pakistanit, pas shpërthimeve. Megjithatë, Ministria e Jashtme tha se kufijtë me Iranin dhe Afganistanin janë mbyllur dhe se shërbimet telefonike në zonat kufitare janë ndalur, për çështje sigurie. Khan, i cili ishte kryeministër nga viti 2018 deri më 2022, është themelues i PTI-së dhe ende gëzon popullaritet të madh, por ai është në burg pasi është dënuar për korrupsion dhe i është ndaluar mbajtja e posteve publike për një dekadë. Favorit për t’i fituar zgjedhjet është Liga Myslimane e Pakistanit e ish-kryeministrit Naëaz Sharif, i cili u kthye në atdhe vitin e kaluar, pas katër vjetëve qëndrimi në mërgim për ta shmangur kryerjen e dënimeve me burg. Pak javë pasi u kthye, dënimet e tij u shfuqizuan, duke e lënë atë të lirë të garojë për t’u bërë kryeministër për herë të katërt. Me rivalin e përbetuar Khan në burg, Sharifi duket ta ketë rrugën e hapur për t’i fituar zgjedhjet