Ukraina do të donte të ndërtonte një mburojë të përbashkët ajrore për t'u mbrojtur nga kërcënimet që vijnë nga Rusia, së bashku me partnerët e saj evropianë, tha të hënën Presidenti ukrainas Volodymyr Zelenski. Udhëheqësit e NATO-s kanë thënë se Rusia ka testuar gatishmërinë dhe vendosmërinë e aleancës me ndërhyrjet në hapësirën ajrore në Poloni dhe shtetet baltike, dhe Kievi thotë se përvoja e tij në përballjen me kërcënimet ajrore do të ishte e vlefshme. "Ukraina i propozon Polonisë dhe të gjithë partnerëve tanë, të ndërtojmë një mburojë të përbashkët plotësisht të besueshme kundër kërcënimeve ajrore ruse", tha Zelenski në një fjalim në Forumin e Sigurisë së Varshavës, përmes lidhjes video. "Kjo është e mundur. Ukraina mund t'i kundërvihet të gjitha llojeve të dronëve dhe raketave ruse dhe nëse veprojmë së bashku në rajon do të kemi armë dhe kapacitet prodhimi të mjaftueshëm", tha ai. I pyetur për Donald Trump, Zelenski tha se qëndrimi i Presidentit amerikan ndaj Ukrainës dhe sigurisë në Evropë kishte ndryshuar.