Deri javën e kaluar, një flotë sekrete anijesh që transportonin naftë ruse nëpër botë nuk kishte treguar ndonjë lidhje të qartë me Kremlinin. Por kjo ndryshoi kur, në një përshkallëzim dramatik, Rusia përdori një avion luftarak në një përpjekje të dukshme për të mbrojtur një nga cisternat që mendohet se është pjesë e flotës. Pasi ushtria estoneze kontaktoi Jaguar, një anije cisternë pa flamur, e sanksionuar nga Mbretëria e Bashkuar më herët këtë muaj, në një përpjekje për të kryer kontroll në bord, një avion luftarak rus Su-35 fluturoi pranë anijes duke hyrë madje në hapësirën ajrore estoneze, thanë Forcat e Mbrojtjes së Estonisë. Ushtria përfundimisht e shoqëroi anijen cisternë jashtë ujërave estoneze. "Kjo është diçka e re," u tha gazetarëve të enjten Ministri i Jashtëm estonez në një takim të NATO-s në Turqi. Rusia tani "zyrtarisht është lidhur" me të ashtuquajturën flotë në hije, shtoi ai. Edhe të tjerë zyrtarë janë në një mendje. “Ky duket të jetë një ndryshim i madh në mënyrën e të menduarit të Kremlinit”, tha për CNN Ed Arnold, bashkëpunëtor në Institutin Mbretëror të Shërbimeve të Bashkuara, një grup ekspertësh me seli në Mbretërinë e Bashkuar.