Avionët luftarakë të NATO-s duhet të tregojnë se mund të ndjekin avionët luftarakë rusë përtej kufijve kombëtarë për të penguar ndërhyrjet e ardhshme, tha një zyrtar i lartë në qeverinë estoneze. Avionët luftarakë të Aleancës kanë tendencë të "dorëzohen" në kufijtë e tyre, në vend që të vazhdojnë fluturimet në hapësirën ajrore të aleatëve të tjerë. Por Moskës duhet t'i tregohet se përpjekjet e mëtejshme për të hyrë në hapësirën ajrore të NATO-s do të përballen me një përgjigje "të unifikuar", tha Jonatan Vseviov, sekretari i përgjithshëm i ministrisë së jashtme të Estonisë. Më 19 shtator, tre MiG-31 rusë shkelën hapësirën ajrore estoneze përmes Gjirit të Finlandës dhe fluturuan për 12 minuta në qiejt e vendit. F18-at finlandeze i ndoqën avionët deri në kufirin estonez, ku ia kaluan operacionin avionëve italianë F-35 të stacionuar në bazën ajrore Amari nën misionin e NATO-s për Policimin Ajror në Baltik. F35-at më pas i ndoqën avionët luftarakë rusë nëpërmjet hapësirës ajrore estoneze deri në enklavën ruse të Kaliningradit. “Ajo që duam që rusët të kuptojnë është se ata përballen me një NATO të bashkuar, jo me një koleksion shtetesh, por me një front të bashkuar, avionët e të cilit mund të operojnë mes kufijve të aleatëve”, tha Vseviov për The Telegraph. “Por kjo – shtoi ai - është më e lehtë të thuhet sesa të bëhet”.