Vendet anëtare të NATO-s kanë rënë dakord për ta bërë prioritet të lartë mbrojtjen e infrastrukturës së Ukrainës, tha të mërkurën shefi i aleancës ushtarake, Mark Rutte. Duke folur për gazetarët, në ditën e dytë të takimit të ministrave të Jashtëm të 32 vendeve anëtare të NATO-s, Rutte tha se gjatë takimit është diskutuar që t’i jepen Ukrainës sisteme të mjaftueshme për mbrojtje ajrore në mënyrë që ajo të mbrojë infrastrukturën e vet nga sulmet ruse. “Pati pajtueshmëri të qartë mbrëmë se mbështetja e Ukrainës, vecanërisht e infrastrukturës së saj, duhet të jetë prioritet”, tha Rutte. “Besoj se aleatët do të sigurohen në ditët dhe javët në vazhdim që ta furnizojnë Ukrainën me çfarëdo që munden”, tha ai. Ky është dimri i tretë radhazi që Rusia sulmon infrastrukturën energjetike të Ukrainës, dhe si pasojë ka shkaktuar viktima dhe ka ndërprerë furnizimin me energji elektrike për mijëra civilë. Mëngjesin e së mërkurës, dronë rusë sulmuan rajonin verior të Çernihivit, duke dëmtuar disa shtëpi në një fshat. Në rajonin qendror të Vinitsia-s, mbetjet e një droni të rrëzuar shkaktuan zjarr në një shtëpi duke e shkatërruar pjesërisht atë. Ndërkohë, Forca Ajrore e Ukrainës raportoi se Rusia përdori një raketë dhe 50 dronë ndaj shënjestrave në Ukrainë. Mbrojtja ajrore e Ukrainës rrëzoi 29 dronë në nëntë rajone ndërkohë që shpërthime të fuqishme u raportuan gjatë natës në portin rus të Detit të Zi, Novorosisk, i cili është një nga qendrat kryesore për eksportet ruse të naftës dhe port i rëndësishëm ushtarak për një pjesë të flotës ruse të Detit të Zi.