Gjenerali britanik Sir Richard Shirreff, ish-Zëvendës Komandant Suprem i Forcave Aleate në Evropë skicoi për Dail Mail një skenar dramtaik dhe shqetësues se si sipas tij, Rusia mund të shkatërrojë mbrojtjen europiane dhe ta zhysë kontinentin në kaos në më pak se pesë ditë. Sipas simulimeve të përshkruara nga Shirreff, duke u bazuar në dobësitë strukturore të aleancës së NATO, një ofensivë e befasishme ruse do të ishte e mjaftueshme për të kapërcyer mbrojtjen aktuale në Evropën Lindore brenda 100 orëve. “Nëse Moska do të niste një sulm të menjëhershëm, NATO nuk do të kishte kohë për të lëvizur trupa apo për të mbrojtur infrastrukturën kritike,” paralajmëroi Shirreff i cili tha se shembja e mbrojtjeve, ndërprerja e transportit dhe komunikimeve, si dhe presioni psikologjik mbi shoqëritë perëndimore, janë ndër pasojat kryesore. Por nga ana tjetër sekretari i Përgjithshëm i NATO-s, Mark Rutte, ka garantuar se Aleanca “është gati të mbrojë çdo centimetër të territorit të saj”, ndonëse raportet ndërkombëtare tregojnë se realiteti në terren është më kompleks. Sipas Institutit Ndërkombëtar për Studime Strategjike, problemet si vonesat në prodhimin e armatimeve, mangësitë në logjistikë dhe mungesa e koordinimit midis ushtrive kombëtare vazhdojnë të jenë shqetësuese. Sipas Shirreff, edhe pse ka pësuar humbje të konsiderueshme në Ukrainë, Rusia ka rritur ndjeshëm prodhimin e saj ushtarak, me theks te artileria, dronët dhe raketat me rreze të mesme.