Mbrojtja ajrore lëvizëse e Kievit ka municion të mjaftueshëm për t'u përballur me disa sulme më të fuqishme, por më pas do të ketë nevojë për më shumë ndihmë perëndimore, tha Serhiy Nayev, komandanti i forcave të përbashkëta të ushtrisë së Ukrainës. Në fund të vitit të kaluar, Rusia nisi sulmet e saj më të mëdha me raketa dhe dronë që nga fillimi i pushtimit në shkurt 2022. Më pas bombardoi kryeqytetin Kiev dhe qytetin e dytë më të madh të Ukrainës, Kharkiv, më 2 janar, duke vrarë pesë persona dhe duke plagosur dhjetëra të tjerë. Ushtria ukrainase tha se Rusia e sulmoi me 90 dronë gjatë natës së shkuar, duke e cilësuar këtë si “numër rekord” të sulmeve ajrore. "Ka municion të mjaftueshëm për t'i bërë ballë disa sulmeve të ardhshme të fuqishme," tha Nayev për agjencinë e lajmeve AFP. Në fund të vitit të kaluar Organizata e Kombeve të Bashkuara i kërkoi Rusisë të ndalojë “menjëherë” sulmet në Ukrainë. Komisioneri i Lartë i OKB-së për të Drejtat e Njeriut, Volker Turk dënoi valën vdekjeprurëse të sulmeve ruse në të gjithë Ukrainën dhe i kërkoi Moskës që të ndërpresë sulmet. "E drejta ndërkombëtare humanitare ndalon në mënyrë eksplicite sulmet e qëllimshme ndaj objekteve civile, dhe sulmet pa dallim, në çdo rrethanë," tha ai.