Mbreti Felipe VI i Spanjës është përballur me protestues të zemëruar keq, teksa ka vizituar rajonin e Valencias, që ka regjistruar përmbytje të pashembullta ditët e fundit. Në disa pamje, banorët e zonës janë dëgjuar duke bërtitur “vrasës” dhe “turp” si edhe kanë hedhur baltë në drejtim të mbretit, i cili është pyetur përse nuk është bërë asgjë për të shmangur tragjedinë. Përmbytjet më të rënda në Spanjë, në dekada, kanë lënë lagje të tëra të mbuluara nga balta dhe dhjetëra makina të bëra kapicë njëra mbi tjetrën. Më shumë se 200 persona kanë humbur jetën si pasojë e përmbytjeve dhe ka ende shumë persona të zhdukur. Ekipet e kërkim-shpëtimit janë duke bërë përpjekje që të gjejnë ndonjë të mbijetuar. Banorët janë tejet të zemëruar për, siç thonë ata, mungesën e paralajmërimit dhe mbështetjes së duhur nga autoritetet pas përmbytjeve. Mbreti Felipe dhe Mbretëresha Letizia vizituan Paiportan të dielën, një nga qytezat e prekura më rëndë. Të shtunën, kryeministri spanjoll, Pedro Sanchez urdhëroi angazhimin e 10.000 ushtarëve dhe policëve shtesë në zonën e prekur nga përmbytjet. Ai tha se ky është angazhimi më i madh ushtarak në Spanjë në kohë paqeje. Por, ai deklaroi se është i vetëdijshëm që përgjigjja nuk ka qenë “e mjaftueshme” dhe ka pranuar “problemet e mëdha dhe mungesat”.