Në një fjalim historik në kongresin amerikan, Mbreti Charles përshëndeti lidhjen 'e pathyeshme' SHBA-Britani pavarësisht 'mosmarrëveshjeve' të kohëve të fundit mes dy shteteve. Mbreti pranoi “dallimet dhe mospajtimet”, por theksoi “angazhimin e përbashkët të vendeve për të mbështetur demokracinë, për të mbrojtur të gjithë njerëzit si dhe përshëndeti guximin e atyre që rrezikojnë jetën e tyre çdo ditë në shërbim të paqes”. “I yni është një partneritet i lindur nga mosmarrëveshjet, por jo më pak i fortë për këtë arsye… Ndaj ndoshta, në këtë shembull, mund të dallojmë se kombet tona në fakt kanë instiktivisht të njëjtat mendje – një produkt i traditave të përbashkëta demokratike, ligjore dhe shoqërore në të cilat qeverisja jonë është e rrënjosur deri më sot”, tha Mbreti që citoi Trumpin duke e quajtur lidhjen SHBA-Britani të Madhe “të pazëvendësueshme dhe të pathyeshme”. Aleanca SHBA-Britani e Madhe, argumentoi Charles, nuk është vetëm strategjike - ajo është ndërtuar mbi parime 250 vjeçare të përbashkëta”. Tani, tha mbreti, është “një epokë më e paqëndrueshme dhe më e rrezikshme sesa bota për të cilën foli nëna ime e ndjerë, në këtë dhomë, në vitin 1991”. “Sfidat me të cilat përballemi janë shumë të mëdha për t’i përballuar çdo komb i vetëm. Por në këtë mjedis të paparashikueshëm, aleanca jonë nuk mund të mbështetet në arritjet e së kaluarës ose të supozojë se parimet themelore thjesht vazhdojnë të ekzistojnë.”, theksoi ai duke nëvizuar se partneriteti mes Britanisë së Madhe dhe SHBA-së është i domosdoshëm.