Në mbledhjen e dytë të komisionit të posaçëm antikorrupsion, karriget e përfaqësuesve të opozitës mbetën sërish bosh, gjë që nuk pengoi vijimin e punimeve të këtij komisioni. Kryetari Fatmir Xhafaj kërkoi reflektim nga ana e kolegëve të opozitës, për të qënë pjesë e këtij procesi reformues. Xhafaj: Ne mbetemi të keqardhur që ende opozita nuk po bëhet pjesë e aktivitetit normal të Komisionit. Kuvendi ka miratuar ngritjen e këtij Komisioni të Posaçëm Parlamentar dhe gjithashtu ka miratuar përbërjen e këtij komisioni duke përcaktuar anëtarët që do të jenë nga mazhoranca dhe opozita. Do të duhej që kolegët e nderuar të opozitës të merrnin pjesë sipas detyrimit të Kuvendit dhe si një nevojë e domosdoshme, jetike, për të qenë pjesë e një procesi të tillë reformues. Shpresoj shumë në reflektimin e tyre dhe besoj që hap pas hapi, duke ecur para me procesin përgatitor, do të kuptojnë kushtetueshmërinë, qëllimin e këtij procesi, rëndësinë që ka ky proces për integrimin e vendit dhe të ardhmen e vendit.”