Administrata Tatimore po vijon pagesat për kompensimin e tatimit të mbipaguar nga Deklarata Individuale Vjetore e të Ardhurave, pas zbritjes së shpenzimeve për arsimin dhe rritjen e fëmijëve. Për çdo fëmijë në ngarkim shuma e shpenzimeve që u zbrit nga totali i të ardhurave është 48 mijë lekë, ndërsa për arsimin e fëmijëve që e përfiton vetëm aplikuesi me të ardhura bruto nën 1.2 mln lekë gjatë plotësimit të DIVA 2025 u llogarit 100 mijë lekë. Sipas të dhënave të siguruara nga aplikuesit, administrata tatimore vijon me procesin e dhënies së kompensimit në llogaritë bankare të deklaruara në e-Filing. Në një rast konkret, një aplikuese me të ardhura bruto vjetore mbi 1,2 mlionë lekë në vit dhe me 1 fëmijë në ngarkim, që kishte dorëzuar kërkesën më 20 Shkurt 2026 përfitoi kompensimin me vlerë 6,200 lekë më 24 qershor 2026, rreth 4 muaj pas aplikimit.