Policia e Tiranës ka finalizuar operacionin e koduar “Hideaëay”, duke goditur një rast të shitjes së lëndëve narkotike në doza, ku ka arrestuar në flagrancë një 16-vjeçar. Sipas Policisë, operacioni u zhvillua nga shërbimet e Komisariatit të Policisë Nr. 3, në bashkëpunim me Seksionin për Hetimin e Narkotikëve të Policisë Tiranë, pas administrimit të informacioneve të siguruara në rrugë operative për një rast të shpërndarjes së drogës. I mituri akuzohet për veprën penale “Prodhimi dhe shitja e narkotikëve”. Gjatë kontrollit fizik ndaj tij, si dhe kontrollit në vendin ku u konstatua, në rrugën “Jordan Misja”, efektivët e Policisë sekuestruan mbi 300 doza kokainë dhe kanabis, të përgatitura për shitje. Po ashtu u sekuestruan një shumë parash në lekë dhe euro, e dyshuar se ishte përfituar nga aktiviteti kriminal, si dhe dy telefona celularë. Policia bën me dije se hetimet vijojnë për identifikimin dhe kapjen e personave të tjerë të përfshirë në këtë veprimtari, me qëllim dokumentimin e plotë të rastit. Materialet procedurale i janë referuar Prokurorisë së Tiranës për veprime të mëtejshme.