Ekipet e kërkim-shpëtimit po vijojnë punën për të gjetur të mbijetuar nën rrënojat e ndërtesave që u shemben pas tërmetit të fortë me magnitudë 7.1 që goditi rajonin e Tibetit gjatë mëngjesit të së martës. Të paktën 126 viktima janë regjistruar deri më tani ndërsa 188 të tjerë janë plagosur. Mediat shtetërore raportojnë se 1.000 shtëpi janë dëmtuar në Tibet. Tërmeti u ndje edhe në Nepalin fqinj dhe në pjesë të Indisë. Shërbimi Gjeologjik i SHBA-së njoftoi se tërmeti kishte magnitudë prej 7.1 ballësh dhe goditi në një thellësi prej rreth 10 kilometrash. Kina e regjistroi tërmetin si 6.8 ballësh. Epiqendra e tërmetit ishte rreth 75 kilometra në verilindje të Malit Everest, i cili shtrihet në kufirin mes Kinës dhe Nepalit. Kjo zonë është sizmologjikisht aktive, pasi aty përplasen mes tyre pllakat nëntokësore të Indisë dhe Eurazisë. Rreth 50 lëkundje u ndjenë pas tërmetit, ndëërsa zona turistike e Malit Everest në anën kineze u mbyll. Rreth 1.500 zjarrfikës dhe pjesëtarë të skuadrave të shpëtimit janë dërguar për të kërkuar njerëzit e bllokuar nën rrënoja, sipas Ministrisë së Menaxhimit të Emergjencave. Gjithashtu, 200 ushtarë iu bashkuan operacionit të kërkimit, raportojnë mediat shtetërore. Temperaturat ndërkohë nuk ndihmojnë aspak. Administrata meteorologjike e kinës tha se temperaturat pranë epiqendrës së tërmetit janë -8 gradë celcius aktualisht dhe do të zbresin në -18 gradë gjatë natës. Si energjia ashtu edhe uji i pijshëm në rajon janë ndërprerë.