Të paktën 11 civilë kanë gjetur vdekjen dhe dhjetra të tjerë janë plagosur nga bombardimi i fundit izraelit mbi një godinë tetëkatëshe në kryeqytetin e Libanit, Bejrut. Mediat vendase thanë se në sulmin e fundit, Izraeli ka përdorur një raketë antibunker, që më herët është përdorur edhe për të vrarë udhëheqësit e Hezbollah, përfshirë këtu Hassan Nasrallah. Përdorimi i kësaj rakete sugjeron se një zyrtar i nivelit të lartë mund të ketë qenë në shënjestër, ndërsa ushtria izraelite nuk ka komentuar në lidhje me këtë sulm. Ministria libaneze e shëndetësisë tha se më shumë se 60 persona ishin plagosur dhe se numri i viktimave pritej të rritet pasi do të kryheshin testet e ADN-së në pjesët e trupit që ishin gjetur. “Ishte një shpërthim shumë i tmerrshëm. Të gjitha dritaret dhe xhamat ishin mbi mua, mbi gruan dhe fëmijët e mi. Shtëpia ime tani është një fushë beteje”, tha një banor i zonës. Paralelisht me sulmet ajrore, Izraeli po përparon edhe në tokë në jug të Libanit. Sipas raportimeve, ushtria izraelite po i afrohet Luginës së Bekas, ku ka një prani të fort të Hezbollahut.