Bosi turk i kriptomonedhave, Faruk Ozer është dënuar me 11.196 vite burg. Vendimi është marë nga një gjykatë turke për krime që përfshinin mashtrimin, udhëheqjen e një organizate kriminale dhe pastrim parash. Edhe 2 vëllezërit dhe motra e tij të përfshirë në skemën e mashtrimit u dënuan gjithashtu me burg. Themeluesi i Thodex u akuzua në prill 2021 për mashtrimin e mijëra investitorëve të kriptomonedhave dhe u shpall në kërkim ndërkombëtar. Pas ngritjes së akuzave, ai u arratis nga Turqia dhe gjeti strehë në Shqipëri. Në fund të gushtit të vitit të kaluar, ai u arrestua në zonën e Himarës, pas 10 ditësh përgjme dhe komunikimi të policisë shqiptare me palën turke. Më 17 nëntor 2022, Gjykata e Shkallës së Parë Elbasan vendosi pro lejimit të ekstradimit të Ozer në Turqi. Turku apeloi vendimin deri në Gjykatën e Lartë, por të gjitha shkallët lanë në fuqi vendimin e gjykatës së Elbasanit. Edhe pse shuma e humbjeve të investitorëve asnjëhërë nuk u bë e ditur zyrtarisht, aktakuza e prokurorisë turke pretendon se është të paktën 13 milionë dollarë. Nga ana tjetër mediat turke raportojnë se bëhet fjalë për rreth 2 miliardë dollarë të përvetësuara përmes skemës së mashtrimit.