Mbështetja për Presidentin amerikan Donald Trump ka shënuar një rënie të lehtë ditët e fundit pasi më shumë amerikanë janë të shqetësuar për drejtimin që po merr ekonomia e SHBA-së pasi lideri i ri kërcënon një mori vendesh me tarifa, zbuloi një sondazh i Reuters dhe Ipsos. Sondazhi gjashtë-ditor, i cili u mbyll të martën, tregoi se 44% e të anketuarve miratuan punën që Trump po bën si president, nga 45% që ishte shifra në një sondazh të mëhershëm. Mbështetja për Trump ishte 47% në një sondazh të 20 dhe 21 janarit, menjëherë pas kthimit të republikanit në Shtëpinë e Bardhë. Përqindja e amerikanëve që nuk e miratojnë presidencën e tij është rritur më shumë, duke arritur në 51% në sondazhin e fundit, krahasuar me 41% që ishte menjëherë pasi ai mori detyrën. Trump gëzon sidoqoftë një shkallë relativisht të lartë mbështetjeje për politikën e tij të imigracionit, me 47% të të anketuarve që mbështesin qasjen e tij që përfshin premtimet për të rritur deportimet e emigrantëve të paligjshëm në vend. Por pjesa e amerikanëve që mendojnë se ekonomia është në rrugën e gabuar u rrit në 53% në sondazhin e fundit nga 43% që ishte në sondazhin mëparshëm. Një shtyllë e forcës politike të Trumpit ka qenë besimi i publikut se politikat e tij do të jenë të mira për ekonominë por vlerësimi i tij ka rënë ndjeshëm në krahasim me mandatin e parë të tij në detyrë.