Një stuhi e madhe e borës, akullit, erërave dhe ulja e temperaturave në Shtetet e Bashkuara ka krijuar kushte të rrezikshme udhëtimi në shtetet qendrore dhe jugore të Shteteve të Bashkuara e deri në Bregun Lindor, duke detyruar autoritetet që të mbyllin shkolla dhe zyra qeveritare në disa shtete. Bora dhe akulli kanë mbuluar rrugët kryesore në mbarë Kansasin, perëndimin e Nebraskës dhe pjesë të Indianas, ku Garda Kombëtare ka aktivizuar ekipet për të ndihmuar rreth kësaj situate. Pritet që në këto shtete të bjerë të paktën 20 centimetra dëborë, teksa erërat pritet të arrijnë deri në 72 kilometra në orë. Shërbimi Kombëtar amerikan i Motit ka lëshuar paralajmërime për stuhi dëbore nga Kansasi dhe Misuri e deri në Nju Xhersi. Nga ky shërbim thanë se ka mundësi që të ketë reshje më të mëdha që janë regjistruar në një dekadë. Vorbulla polare e ajrit ultra të ftohtë zakonisht rrotullohet rreth Polit të Veriut. Banorët në SHBA, Evropë dhe Azi përjetojnë të ftohtin e saj intensiv kur rrymat e ajrit zhvendosen drejt jugut. Studimet kanë treguar se ngrohja e shpejt e Arktikut pjesërisht është fajtore për intensifikimin e vorbullës polare që po zgjeron ndikimin e saj. Gjatë ditës pritet që edhe në pjesë të tjera të vazhdojë mbyllja e shkollave për shkak të motit. Në Marilend është shpallur gjendje e jashtëzakonshme një ditë më parë dhe përveç shkollave, atje është mbyllur edhe qeveria shtetërore. Autoritetet në Kentaki po ashtu kanë vendosur këtë masë.