Nëndetësja më e re e Vladimir Putinit, e cila është projektuar për të mbajtur torpedo bërthamore të afta për të shkaktuar një cunami, është lëshuar në det për herë të parë. Kremlini dërgoi nëndetësen bërthamore Khabarovsk për prova detare në Detin e Bardhë, pa shumë bujë javën e kaluar. Nëndetësja 10,000 tonëshe është projektuar për të mbajtur deri në gjashtë torpedo bërthamore Poseidon përveç raketave të saj të zakonshme kundër anijeve dhe atyre për sulme në tokë. Raketat Poseidon thuhet se kanë një rreze veprimi prej më shumë se 10 mijë kilometrash dhe mund të zhyten deri në 1 mijë metra. Në teori, thonë analistët, një shpërthim nënujor i krijuar nga Poseidon mund të shkaktojë një valë masive radioaktive në thellësi, duke dërguar dallgë të mëdha cunami që mund të shkatërrojnë qytete. Ditët e fundit, propagandistët e Kremlinit i kanë bërë thirrje Putinit që të lëshojë raketën potencialisht vdekjeprurëse drejt Britanisë së Madhe si hakmarrje për vendimin e Londrës për të furnizuar Ukrainën me dronë që janë përdorur për të goditur territorin rus. Vladimir Solovyov, një prezantues në televizionin shtetëror, tha: "Jepuni britanikëve tre ditë kohë që të mësojnë të marrin frymë nën ujë, pastaj goditini me Poseidon". Kur Putin konfirmoi një provë të Poseidon në fillim të këtij viti, ai tha se Rusia e kishte lëshuar atë nga një nëndetëse dhe më pas kishte aktivizuar reaktorin që e furnizon me energji. "Nuk ka asgjë të krahasueshme me të", i tha ai një grupi zyrtarësh ushtarakë vitin e kaluar. "Nuk ka asnjë mënyrë për ta ndaluar atë".