Procesi i Dialogut Strategjik ndërmjet Shteteve të Bashkuara të Amerikës dhe Serbisë ka nisur në Uashington, ku sekretari amerikan i Shtetit, Marco Rubio priti ministrin e Punëve të Jashtme të Serbisë, Marko Gjuriç, ku nënshkruan dy memorandume – një për bashkëpunim në fushën e energjisë dhe një memorandum mirëkuptimi për bashkëpunim në fushën e arsimit. Gjuriç tha se memorandumi për bashkëpunim në fushën e energjisë “do të hapë perspektiva të reja të rëndësishme për sigurinë energjetike të vendit tonë, pasi parashikon ndërtimin e ndërlidhësve të rinj të gazit”. Ndërsa për atë në fushën e arsimit, kryediplomati serb tha se ka të bëjë me “zgjerimin e programit Fulbright, i cili do të krijojë mundësi të reja për studentët, të rinjtë dhe komunitetin shkencor, si dhe do t’u mundësojë të dy vendeve që së bashku të mbështesin komunitetin akademik dhe zhvillimin e tij”. Departamenti amerikan i Shtetit tha më herët për Radio Evropa e Lirës se Dialogu Strategjik “paraqet një epokë të re në marrëdhëniet mes dy vendeve”. “Nëpërmjet këtij dialogu, SHBA-ja dhe Serbia do të punojnë për arritjen e objektivave të përbashkëta, përfshirë paqen dhe stabilitetin rajonal, zgjerimin e lidhjeve në fushën e biznesit dhe arsimit, si dhe ndërtimin e një të ardhmeje më të begatë”, tha DASH për REL.