Një grup burrash të maskuar bllokoi të shtunën rrugët që të çojnë drejt Portit të Doverit, në atë që autoritetet e përshkruan si një protestë të dyshuar kundër emigracionit. Porti i Doverit, i cili ka dhe ngarkesën më të madhe të trageteve, njoftoi se qarkullimi në hyrje dhe dalje ishte ndërprerë për shkak të një “incidenti të rendit publik”, ndërsa policia tha se po komunikonte me protestuesit. Pamjet e publikuara në rrjetet sociale tregojnë dhjetëra burra të veshur me të zeza dhe me fytyrat e mbuluara, të vendosur në një nga rrugët kryesore pranë portit. Në një prej videove, protestuesit shihen të kapur krah për krah duke bllokuar rrugën dhe duke thirrur: “Ndaloni varkat!”, në referencë të emigrantëve që kalojnë Kanalin Anglez me gomone nga Franca drejt Britanisë. Chris Vinson, një këshilltar lokal i Partisë Konservatore, tha se protesta dukej se ishte e lidhur me emigracionin e paligjshëm.