Në të gjithë vendin janë vendosur 171 masa administrative me vlerën 3.000 lekë secila, në ditën e parë të hyrjes në fuqi të aktit normativ që detyron të gjithë qytetarët të mbajnë maskat edhe në ambientet e jashtme. Sipas njoftimit të policisë gjatë kontrolleve në të gjithë vendin, shërbimet e Policisë I kanë vendosur këto gjoba për ata qytetarë që nuk kishin vendosur maskat dhe as nuk i kishin ato me vete. Policia njofton se gjatë kontrolleve është konstatuar që shumica e qytetarëve i kishin vendosur maskat mbrojtëse. Në rastet kur janë konstatuar qytetarë që nuk kishin maska ose që i kishin por nuk i vendosnin në fytyrë, shërbimet e Policisë i kanë këshilluar ata për vendosjen e tyre. Punonjësit e Policisë vijojnë kontrollet në terren, për të monitoruar zbatimin e masës së re për parandalimin e përhapjes së COVID-19, mbajtjen e detyrueshme të maskës mbrojtëse, e cila është detyrim për të gjithë qytetarët, që në momentin që dalin nga shtëpia. Policia thekson se shërbimet e saj do të jenë prezente çdo ditë, në ambiente të ndryshme në të gjithë vendin dhe në rast se do konstatojnë qytetarë që nuk kanë vendosur maskat mbrojtëse, do të marrin masat administrative sipas Aktit Normativ.