Puna hetimore e shërbimeve policore të Korçës ka nxjerrë në pah detaje të reja nga plagosja e 33 vjeçarit, Marsel Rusi. Në mbrëmjen e 11 majit, rreth orës 22 e 40, ky shtetas në shoqërimin e mikut të tij Andi Andri janë paraqitur në Spitalin e Korçës. Si pasojë e një plage në fundshpinën e 33 vjeçarit, dy shtetasit kanë kërkuar trajtim mjekësor nga bluzat e bardha. Menjëherë pas marrjes së trajtimit mjekësor, kanë mbëritur uniformat blu për të marrë dëshminë e dy shtetasve. Në deklaratën e tyre, ata kanë pohuar se 33 vjeçari është qëlluar me armë zjarri nga një person tjetër, në hyrje të pazarit të Korçës. Pas punës hetimore të uniformave blu dhe zbardhjes së pamjeve të kamerave të sigurisë në këtë zonë ka rezultuar se dy shtetasit kanë bërë kallzim të rremë, për të devijuar nga e vërteta e ngjarjes. Burimet bëjnë me dije se Marsel Rusi është vetëplagosur në rrethana ende të paqarta dhe haludimet e tij për plagosjen nga një tjetër shtetas janë rrëzuar nga provat policore. Ka mbetur akoma mister arma e zjarrit me të cilën është kryer vetëplagosja, teksa forcat policore po punojnë për zbulimin e plotë të rrethanave të ngjarjes. Dy shtetasit Marsel Rusi dhe Andi Andri janë arrestuar në flagrancë, materialet iu referuan Prokurorisë pranë Gjykatës së Shkallës së Parë Korçë për veprime të mëtejshme hetimore.