Hetimet e Policisë së Tiranës kanë zbuluar të tjerë persona që mashtronin përmes call centerave persona të huaj, që investonin në bursë. Me aktivitet të palicencuar, Policia ka nisur procedimin penal për administratorët e 9 subjekteve call center, për veprat penale "Mashtrimi", "Fshehja e të ardhurave" dhe "Mospagimi i taksave dhe tatimeve". Bazuar në operacionion policor të koduar “Nine”, rezultoi se këta shtetas dyshohet se mashtronin shtetasit e huaj, kryesisht nga vendet e BE-së, që të investonin në bursë. Hetimi u krye nga Seksioni për Hetimin e Krimit Ekonomik e Financiar, në bashkëpunim me Prokurorinë e Tiranës. Veprimet proceduriale kanë nisur në Shqipëri, pas kërkesës së agjencive ligjzbatuese nga jashtë Shqipërisë, kryesisht Gjermani, Danimarkë, Francë, apo Holandë. Përgjithësisht ankesat kanë ardhur nga shtetas të huaj, ku sipas tyre kompanitë e call center-it, u premtonin atyre një kontratë në këmbim të një shumë parash, por nuk e marrin këtë shërbim. Të dhënat e hetimit bëjnë me dije, se ka ende persona të implikuar, për të cilët vijon hetimi deri në dokumentimin e plotë të këtij aktiviteti kriminal.