Kryedemokrati Sali Berisha në një dalje për mediat nga selia blu deklaroi se ka zhvilluar një takim me Christian Forneck, këshilltar për politikën e jashtme dhe të sigurisë pranë grupit parlamentar CDU/CSU në Bundestagun Gjerman. Ai bëri me dije se e ka njohur zyrtarin gjerman me lidhjet që qeveria ka sipas tij me krimin, duke shtuar se procesi i integrimit në BE duhet të bazohet vetëm në meritë. Berisha tha se nëse do ishte ndjekur plani i Bundestagut gjerman, Shqipëria do të ishte shumë pranë anëtarësimit në BE. ‘Plani prej 15 pikash, që hartuan për Shqipërinë bazuar në misionet e tyre fact-finding, në qoftë se do ishte zbatuar, Shqipëria do ishte, ndoshta afër vendit anëtar ose pothuaj anëtar. Pra, kanë bërë, kanë mbajtur, kanë pasur interesa shumë serioze, shumë të përgjegjshme. Përpjekja jonë është kjo, thjesht, që Bundestagu të ruajë këtë interes që ka pasur, për këtë proces jetik për shqiptarët.’ Ndër të tjera, kryedemokrati shtoi se kishte diskutuar në takim edhe mashtrimet me call center-at, duke e cilësuar të turpshme që Shqipëria po kthehet në një vend ku mashtrohen pensionistët europianë, ndërkohë që BE jep fonde gjithë kohës.