Gjykata e Tiranës ka bllokuar llogaritë bankare të gjashtë kompanive që operojnë kryesisht në sektorin e ndërtimit nën dyshimet e mashtrimit me taksën mbi vlerën e shtuar, evazionit fiskal dhe fshehjes së të ardhurave. Bllokimi i llogarive me 73 milionë lekë në total është bërë me kërkesë të prokurorisë së kryeqytetit. Prokuroria thotë se nga hetimet rezultoi se këto subjekte kanë përdorur fatura fiktive me qëllim shmangjen e detyrimeve tatimore. Këto subjekte dyshohet se kanë qenë pjesë e një skeme të organizuar, ku janë lëshuar dhe përdorur fatura për punime dhe shërbime të pa kryera realisht, me qëllim përfitimin e padrejtë të TVSH-së dhe uljen e detyrimeve fiskale. Nën sekuestro janë vendosur edhe llogaritë e kompanive Albavia, Kukës Chrome Minerals dhe Troci 2005. Nga analiza financiare e prokurorisë rezultoi se vlera e transaksioneve të dyshuara shkon mbi 73 milionë lekë, ndërsa dëmi i mundshëm ndaj buxhetit të shtetit lidhet me mosdeklarimin dhe shmangien e pagesës së tatimeve. Prokuroria njofton se në këtë fazë të procedimit është kërkuar bllokimi i llogarive për të parandaluar lëvizjen e fondeve, teksa hetimet vijojnë për identifikimin e personave të përfshirë në skemën e dyshuar të mashtrimit.