Kur sezoni turistik i vitit 2021 ende nuk kishte hyrë në kulmin e vet, bizneset nëpër zonat e plazhit luftonin për hapësira me njëra-tjetrën për të rekuperuar humbjet e një sezoni më parë, ku për shkak të pandemisë qarkullimi ishte pothuajse zero. Por, beteja për shezlonë dhe hapësira në plazhin e Velipojës prodhoi më 27 qershor 2021 katër të vrarë pas një sherri mes familjes Verracaku dhe asaj Gocaj. Në atë kohë, Kujtim Ferracaku, pronar i restorant “Fantazia” është konfliktuar me pronarët e hotel “Gocaj” për shezlonët në plazhin e Velipojës. Ai akuzonte këta të fundit se kishin vendosur shezlonë në hapësirën që i takonte atij dhe për këtë arsye shkon gjatë orëve të mbrëmjes për t’u sqaruar. Sqarimi përfundoi në përdorimin e armëve nga të dyja palët. Në përplasjen e përgjakshme në Velipojë, mbetën të vdekur në vend Kujtim Verracaku 59 vjeç, vëllezërit Xhovani dhe Edmond Gocaj 25 dhe 38 vjeç dhe Musaein Zeneli 20 vjeç, ky i fundit kamarier në hotelin e Gocajve. I plagosur mbeti Hasan Verracaku dhe Ermelind Dyli, që të dy të arrestuar pas ngjarjes me akuzën e vrasjes.