Seanca fillestare ndaj 21 serbëve të akuzuar për Masakrën e Reçakut, do të mbahet më 20 korrik në Gjykatën Themelore në Prishtinë. Aktakuza është ngritur më 30 dhjetor 2025, ku sipas saj 21të pandehurit akuzohen se më 15 janar 1999, gjatë një operacioni të forcave policore dhe ushtarake serbe, në fshatin Reçak të Komunës së Shtimes, kanë vrarë 42 civilë shqiptarë. Në periudhën 1998–1999, sipas Prokurorisë, të pandehurit, në bashkëpunim, si pjesëtarë të Ushtrisë së ish-Jugosllavisë, si dhe të Ministrisë së Punëve të Brendshme të Serbisë (MUP), kanë kryer trajtim çnjerëzor ndaj civilëve, shkatërrim të pasurisë, dëbim masiv dhe spastrim etnik. Sipas hetimeve, forcat serbe fillimisht e rrethuaan fshatin Reçak, për të vazhduar më pas me granatime nga distanca, kontrolle shtëpi më shtëpi. Gratë dhe fëmijët u dëbuan me forcë nga fshati, ndërsa burrat e ndaluar u ekzekutuan. Si pasojë e operacioneve, rreth 20 mijë civilë nga fshatrat Reçak, Topillë, Petrovë, Kraisht, Mullapolc dhe Dremjak u dëbuan nga shtëpitë e tyre. Prokuroria Speciale ka njoftuar se i ka propozuar Gjykatës Themelore në Prishtinë mbajtjen e gjykimit në mungesë, pasi të pandehurit janë të paarritshëm për organet e drejtësisë.