Persona të armatosur kanë qëlluar për vdekje kryebashkiakun e një qyteti në meksikën perëndimore dhe të paktën edhe 17 persona të tjerë. Policia tha se agresorët kishin sulmuar bashkinë e San Miguel Totolapan në orën 14.00 sipas orës lokale. Fotot e postuara online, tregonin godinën të shpuar nga plumbat. Kryebashkiaku Conrado Mendoza Almeda mbeti i vrarë. Për sulmin u fajësua një grup kriminal i qytetit, Los Tequileros, i lidhur me një kartel të fuqishëm droge. Oficerë të policisë dhe punonjës të bashkisë u vranë po ashtu në masakër me imazhet e trupave të pajetë, të mbuluar në gjak e të shtrirë në tokë që qarkulluan në mediat sociale. Edhe babai i kryebashkiakut, që më herët kishte mbajtur këtë post po ashtu, ishte vrarë në shtëpinë e tij para sulmit në bashki. Një rrugë hyrëse në qytet ishte bllokuar nga makina të mëdha më herët për të penguar forcat e sigurisë që të mbërrinin atje. Edhe pse dhuna në meksikë nuk është e pazakontë, ky episod është tronditës. Qyteti shtrihet në qendër të një rajoni të njohur si Tierra Caliente, një pjesë e dhunshme e meksikës perëndimore të kontrolluar nga kartelet e drogës. Disa grupe përplasen për kontrollin e trajektorëve të drogës përgjatë korridorit në paqësor. Pas sulmit, ministria meksikane e mbrojtjes tha se do të dislokonte ushtrinë dhe njësitë e marinës në zonë për të gjetur autorët.