Më 8 korrik, më shumë se 4.000 pjesëmarrës u nisën nga Nezuku, afër Tuzlës, në një marshim prej 100 kilometrash drejt Srebrenicës. “Marshi i Paqes” organizohet për të nderuar viktimat e gjenocidit të vitit 1995 të kryer në zonën që ishte nën mbrojtjen e Kombeve të Bashkuara. Pjesëmarrësit do të ecin për tre ditë në të njëjtat rrugë ku ecën edhe banorët e Srebrenicës, teksa tentonin të kalonin në Tuzla apo Kladnje në korrik të vitit 1995. Pjesëmarrësit planifikojnë të arrijnë në Potoçari më 10 korrik, në mënyrë që një ditë më pas të marrin pjesë në ngjarjet që shënojnë përvjetorin e gjenocidit dhe funeralet kolektive në Qendrën Memoriale për Srebrenicën në Potoçari. “Marshi i Paqes” organizohet që nga viti 2005 dhe numri i pjesëmarrësve është rritur çdo vit. Qëllimi i kësaj ngjarjeje është që të ndërtojë, përmirësojë dhe nxisë kulturën e përkujtimit të gjenocidit kundër boshnjakëve në Srebrenicë. Gjatë ecjes treditore, pjesëmarrësit do të kryejnë mbi 30 kilometra në ditë. Rruga është e shënjuar dhe pjesëmarrësve u jepet ujë, ushqim dhe ndihmë mjekësore, nëse është e nevojshme. Në korrik të vitit 1995, trupat e Ushtrisë së Republikës Sërpska vranë më shumë se 8.300 boshnjakë në Srebrenicë dhe qytetet përreth. Më 2007, Gjykata Ndërkombëtare e Drejtësisë në Hagë vendosi se Ushtria e Republikës Sërpska kreu gjenocid në Srebrenicë. Në atë kohë, Srebrenica ishte zonë e mbrojtur e OKB-së. Gjykata e konsideroi Serbinë fajtore për mosparandalimin e gjenocidit e po ashtu tha se Serbia ka shkelur obligimin për të ndëshkuar autorët e gjenocidit.