Republika e Kosovës dhe Mbretëria e Arabisë Saudite kanë nënshkruar marrëveshje doganore në ceremoninë hapëse të Konferencës Ndërkombëtare për “Zekatin, Tatimin dhe Doganat 2024”. Ka qenë ministri i Financave, Hekuran Murati, i cili është shprehur se marrëveshja adreson çështjet doganore dhe është në përputhje me standardet më të larta ndërkombëtare. “Duke përafruar bashkëpunimin tonë shumëdimensional në fushën e Doganave, marrëveshja do të kontribuojë në lehtësimin e tregtisë, përmirësimin e sigurisë dhe rritjen e bashkëpunimit ekonomik”, shkruan Murati përmes postimit në FaceBook. Arabia Saudite e ka njohur pavarësinë e Kosovës më 20 prill 2009, e cila solli forcimin e pozitës ndërkombëtare të Kosovës. Arabia Saudite, përmes organizatave si Fondi Saudit për Zhvillim dhe organizata të tjera bamirëse, ka ndihmuar në projekte infrastrukturore dhe sociale në Kosovë, veçanërisht pas luftës së vitit 1999.