Elon Musk pretendon se Komisioni Evropian i ka ofruar platformës X një marrëveshje sekrete të paligjshme, që lidhet me censurimin e fjalës së lirë, pak pasi Komisioni Evropian akuzoi platformën për shkelje të ligjeve digjitale të BE-së. Përmes një postimi në platformën X, shefi ekzekutiv i kësaj platforme tha se nëse e pranonin një marrëveshje të tillë, pa i thënë askujt, nuk do të gjobiteshin nga komisioni. “Platformat e tjera e pranuan atë marrëveshje. X jo,” tha ai ndër të tjera në postimin e tij. “Ne presim një betejë shumë publike në gjykatë, në mënyrë që njerëzit e Evropës ta dinë të vërtetën”, shtoi Musk. Deklarata e Muskut vjen pak pasi Komisioni Europian tha se kjo platformë ka bërë një sërë shkeljesh që lidhen me transparencën e reklamave dhe qasjen e të dhënave për studiuesit. Më tej Komisioni paraljmëroi se nëse këto akuza konfirmohen, platforma X mund të përballet me gjoba të rënda. Ky pretendim i Musk është hedhur poshtë nga Komisioni Europian, ku Komisioneri për Tregun e Brendshëm, Thierry Breton në përgjigje ndaj shefit ekzekutiv të X tha se nuk ka pasur dhe nuk do të ketë kurrë marrëveshje sekrete me askënd.