Liderët e Armenisë dhe Azerbajxhanit janë thirrur në Shtëpinë e Bardhë për të nënshkruar një marrëveshje paqeje të ndërmjetësuar nga SHBA, që mund t’i japë fund konfliktit që zgjat prej dekadash. Do të jetë vetë presidenti amerikan, Donald Trump ai që do të presë udhëheqësit e të dy vendeve. Kryeministri armen, Nikol Pashinian, dhe presidenti azerbajxhanas, Ilham Aliyev, do të nënshkruajnë gjithashtu marrëveshje me Shtetet e Bashkuara për të “ndjekur së bashku mundësitë ekonomike, në mënyrë që të shfrytëzojnë plotësisht potencialin e rajonit të Kaukazit të Jugut”, tha Trump në platformën Truth Social. “Shumë liderë kanë provuar t’i japin fund kësaj lufte, por pa sukses, deri më tani, falë ‘TRUMPIT’”, shkroi ai, duke shtuar se do të jetë “një ceremoni zyrtare e nënshkrimit të paqes”. Marrëveshjet ekonomike mund të hapin rrugën për rihapjen e një korridori strategjik transporti në Kaukazin e Jugut, i cili ka qenë i mbyllur që nga fillimi i viteve ’90. Sipas zyrtarëve amerikanë, të cituar në raportimet mediatike në kushte anonimiteti, marrëveshjet do t’i jepnin Shteteve të Bashkuara të drejtën e qirasë për zhvillimin e korridorit të Zangezurit dhe ai do të emërtohej “Rruga Trump për Paqe dhe Prosperitet Ndërkombëtar”. Ky korridor do të lidhte Azerbajxhanin me rajonin e tij të Nakhçivanit, i cili është i ndarë nga pjesa tjetër e vendit nga një shtrirje 32 kilometërshe e territorit armen, dhe do të përfshinte në të ardhmen një linjë hekurudhore, tubacione për naftë dhe gaz, si dhe linja me fibra optike, duke mundësuar qarkullimin e mallrave dhe më vonë edhe të njerëzve. Marrëveshja nuk parashikon që Shtetet e Bashkuara të financojnë ndërtimin e korridorit të tranzitit, por u bën thirrje korporatave private ta zhvillojnë atë.