Në samitin e G20-ës, presidenti turk, Recep Tayyip Erdogan ka kërkuar që të plotësohen pjesërisht kërkesat e Rusisë për ‘marrëveshjen e grurit’ dhe të lehtësohen sanksionet ndaj Rusisë. ‘Turqia po u kërkon udhëheqësve botërorë të lehtësojnë sigurimin e eksporteve ruse të ushqimit dhe plehrave dhe të rilidhën Moskën me sistemin SËIFT për pagesat ndërkombëtare’, pohoi lideri turk. Turqia po u thotë homologëve të saj perëndimorë se mënyra për të ringjallur marrëveshjen është lehtësimi i disa sanksioneve, të cilat e pengojnë Moskën të importojë pajisje bujqësore. Ndërkohë, shefi i zyrës së presidentit të Ukrainës, Andriy Yermak, ka kërkuar që të mos hiqen sanksionet. Ai theksoi se ‘në këtë situatë, forca funksionon dhe jo kompromisi’. Një javë më parë presidenti turk Erdogan zhvilloi një takim me liderin rus, Vladimir Putin, ku edhe diskutimet u ndalën më tej tek lufta në Ukrainë. Blloku mbeti thellësisht i ndarë në lidhje me luftën në Ukrainë, ku vendet perëndimore këmbëngulin për dënime më të ashpra ndaj Rusisë, ndërsa të tjerët kërkojnë që grupi të fokusohet në çështje më të gjera ekonomike.