Turqia ka inauguruar këtë të hënë aeroplanmbajtësen më të madhe, të quajtur TCG Anadolu. Kjo luftanije do të jetë e para në zotërimin e marinës turke, që do të transportojë mjetet ajrore luftarake pa pilot. TCG Anadolu është ndërtuar në kantierin detar të Sedefit, pranë Stambollit dhe e bën marinën turke ndër të paktat në botë, që kanë një aeroplanmbajtëse të ndërtuar në vend. Duke folur në ceremoninë e dorëzimit të saj te marina, në Stamboll, presidenti turk Rexhep Taip Erdogan tha se TCG Anadolu, ku mund të ulen dhe ngrihen helikopterët dhe dronët më të mëdhenj dhe më të rëndë, është luftanija e parë në botë në fushën e saj. Dronët turq Bayraktar TB3 dhe Kizilelma, si dhe aeroplanët e sulmeve të lehtë Hurjet, mund të ulen dhe të ngrihen nga luftanija që prej ditës së sotme është në dispozicion të ushtrisë turke. Anija TCG Anadolu, e prodhuar në kuadër të Projektit të Anijeve Amfibe Sulmuese me Shumë Qëllime, do të jetë në gjendje të transferojë të paktën një battalion të tërë në vendndodhjen e caktuar, bashkë me mbështetjen e tij logjistike. Aeroplanmbajtësja më e re dhe më modern e marinës turke ka një gjatësi prej 231 metrash dhe një gjerësi prej 32 metrash, teksa tashmë Turqia mund të krenohet se ka një flotë ushtarake edhe më të kompletuar.