‘Maratona e Bebeve’ u zhvillua këtë të premte në Sallën e Pallatit të Sportit “Arefi Berberi” në Pogradec duke mbushur sallën me emocione dhe duartrokitje. Në aktivitetin tashmë të kthyer në një traditë për Pogradecin morën pjesë mbi 90 vogëlushë në këtë garë simbolike, të organizuar nga Bashkia Pogradec në bashkëpunim me shoqatën “Marathon Albania”. Edhe pse protagonist ishin bebet, organizimi respektoi standardet e një gare të mirëfilltë, ku secili pjesëmarrës u pajis me numër gare dhe çip matës për regjistrimin e kohës. Të gjithë fëmijët u vlerësuan me medalje për pjesëmarrjen, ndërsa fituesit e çdo grupmoshe u shpërblyen edhe me kupa, duke përjetuar emocionet e para të një suksesi sportiv. Përfaqësuesit e organizimit theksuan se Pogradeci mbetet djepi i kësaj tradite që po rritet vit pas viti. Mes emocioneve, buzëqeshjeve dhe kujtimeve të bukura familjare, Pogradeci mbylli me sukses edhe këtë edicion të “Maratonës së Bebeve”, duke kurorëzuar kampionët e tij më të vegjël.