Bashkimi Demokratik për Integrim përmes një reagimi zyrtar në rrjete sociale ka ngritur shqetësimin për mungesën e përfaqësuesve shqiptarë në delegacionin e Maqedonisë së Veriut në samitin e NATO-s në Ankara, që nisi punimet këtë 7 korrik, duke thënë se ky është një mesazh i gabuar që Shkupi zyrtar e dërgon te qytetarët dhe aleatët. “Në Samitin e NATO-s në Turqi, Maqedonia e Veriut paraqitet me një delegacion pa asnjë përfaqësues shqiptar. Kjo është pasqyrë e një mentaliteti politik që e sheh shtetin si pronë të një etnie, ndërsa shqiptarët vetëm si dekor të brendshëm”, thuhet në reagimin e BDI-së. Më tej në reagim, Bashkimi Demokratik për Integrim thotë se Maqedonia e Veriut është shtet multietnik dhe anëtare e NATO-s falë një arkitekture politike që ndërtohet mbi barazi, përfaqësim dhe Marrëveshjen e Ohrit. BDI shkruan se ‘delegacionet shtetërore duhet ta reflektojnë realitetin e vendit dhe jo ta fshijnë’. Sipas partisë, shteti nuk mund të përfaqësohet drejt kur gjysma e realitetit të tij lihet jashtë.