Këshilli i Sigurisë në maqedoninë e veriut, vendosi të vazhdojë gjendjen e jashtëzakonshme në vend edhe me 14 ditë të tjera. Kjo u konfirmuar nga presidenti i vendit, Stevo Pendarovski, menjëherë pas mbledhjes së mbajtur paraditen e të shtunës. “Vendimi për gjendjen e jashtëzakonshme është marrë me qëllim që t’i mundësohet Qeverisë që të përballet më lehtë dhe më mirë, bashkë me institucionet shëndetësore, me pandeminë dhe kjo nuk ka lidhje me datën e zgjedhjeve” – tha Pendarovski. Vendi ndërkohë vazhdon të regjistrojë viktima dhe raste të reja të koronavirusit. Pesë viktima u raportuan të shtunën si pasojë e koronavirusit dhe 35 raste të reja. Ndërkohë që instituti i shëndetit publik tha se 19 pacientë të rinj ishin shëruar 24 orët e shkuara. Të premten ndërkohë u raportuan katër viktima dhe 52 raste të reja. Numri total i viktimave në maqedoninë e veriut tashmë ka shkuar në 130 ndërsa totali i të prekurve në vend ka shkuar në mbi 2100. Zyrtarët në vend kanë shprehur shqetësim në lidhje me shifrat në rritje të koronavirusit dhe kanë bërë apel për kujdes të shtuar.