Gjykata Kushtetuese e Maqedonisë së Veriut, nuk ka një vendim për ligjin e gjuhëve, duke shtyrë seancën me propozimin e një séance përgatitore ku synohet debat me ekspertë dhe parti politike. Propozimi në fjalë është miratuar me 5 vota pro e një kundër nga anëtarët e gjykatës. Vota kundër ishte e gjykatëses Dobrilla Kacarska e cila njëherësh është shprehur se nuk do të marrë pjesë në seancën përgatitore. Sipas saj, një gjë e tillë është e panevojshme duke pasur parasysh faktin se “ka një vendim të Komisionit të Venecias”. Nga ana tjetër kujtojmë se edhe të martën pati një seancë në Kushtetuese për të njëjtën çështje, por që u braktis nga gjyqtari Fatmir Skënderi. Ai kërkoi anulimin e seancës për të mundësuar pjesëmarrjen e dy gjyqtarëve shqiptarë Osman Kadriu dhe Naser Ajdari të cilët kishin vendosur të mos merrnin pjesë. Ndërkaq, kryetari i Bashkimit Demokratik për Integrim (BDI), Ali Ahmeti i cili ka qëndruar para Gjykatës Kushtetuese në Shkup derisa në rend dite aty ishte diskutimi për Ligjin për gjuhët, ka thënë që gjykatësit nuk duhet të marrin vendime të njëanshme. Ai ka kërkuar që të ruhet bashkëjetesa dhe demokracia në Maqedoninë e Veriut. Ligji për përdorimin e gjuhëve në Maqedoni të Veriut i detyron institucionet shtetërore të lejojnë përdorimin zyrtar të gjuhëve që fliten nga të paktën 20 për qind e qytetarëve. Këtu bëhet fjalë edhe për gjuhën shqipe. Në Maqedoni të Veriut, rreth 30 për qind e popullsisë janë shqiptarë, nga rreth 2 milionë banorë sa numëron shteti. Debati për këtë temë është rritur pas ardhjes në pushtet të VMRO-DPMNE, parti maqedonase e cila e kishte kundërshtuar këtë ligj.