Partia Demokratike thotë se komisioni I Venecias nuk ka marrë ende vendimmarrje për çështjen e mandatit të Olta Xhaçkës. Përmes një reagimi, grupi I PD akuzon kryeparlamentaren Elisa Spiropali se po mban të fshehtë draft opinionin dhe se ka përjashtuar opozitën nga ky proces. “Padyshim kur ka trajtuar parimin e mandatit jo detyrues, jo Komisioni i Venecias, por edhe vetë Gjykata jonë Kushtetuese, sqaron që deputetet si rregull janë të lirë të votojnë sipas vullnetit të tyre, por ky rregull sigurisht që nuk ka lidhje me çështjen në fjalë, siç Gjykata Kushtetuese ka sqaruar.”, thuhet në reagimin e PD. Ndërkohë më tej grupi I demokratëve dënon me forcë sjelljen, sipas tyre, “dezinformuese të Kryetarës së Kuvendit që synon të krijojë konfuzion në opinionin publik, vetëm me qëllim që të mbrojë pandëshkueshmërinë e bashkëpunëtores së Edi Ramës, deputetes strategjike Olta Xhaçka, si dhe të fsheh faktin se për herë të parë në 34 vite Kuvendi ka refuzuar të zbatojë dy vendime të Gjykatës Kushtetuese.”