5 deputetë kanë dorëzuar mandatin e deputetit, pasi garojnë për kryetar bashkie, e rrjedhimisht mandati i tyre u kalon kandidatëve të radhës në listat shumëemërore. Nisur nga kjo, në vend të Belind Këlliçit do të jetë demokrati Asllan Dogjani, Luçiano Boçi në Elbasan do të zëvendësohet nga Qani Xhani ndërsa mandati i Zef Hilës i takon Bardh Spahisë, por ky është kryetar i Bashkisë Shkodër dhe kandidat për një tjetër mandat, e kësisoj mandatin që nuk e pranon Spahia i kalon Ludovik Hasanit. Ndërkohë nga radhët e socialistëve largohen 2 deputetë, përkatësisht Benet Beci në Shkodër, mandat i cili i kalon Ilir Beqajt. Ky i fundit mësohet se nuk e ka pranuar mandatin, e kësisoj në Kuvend pritet të shkojë i radhës në listë Frrok Gjini. Ndërkohë mandati i Besjan Ajazit, i cili kandidon për Bashkinë e Gramshit, i kalon Shkëlqim Bullarit.