Kryebashkiaku i Nju Jorkut po shqyrton mundësitë ligjore për arrestimin e Benjamin Netanyahut nëse kryeministri izraelit shkel në qytet. Para se të vinte në pushtet, Zohran Mamdani ishte zotuar të respektonte një urdhër arresti për Netanyahun të lëshuar nga Gjykata Ndërkombëtare Penale për krime lufte në Gaza. Udhëheqësi izraelit pritet në Nju Jork në fund të shtatorit për t'iu drejtuar Asamblesë së Përgjithshme të Kombeve të Bashkuara. "Unë besoj se Kryeministri Netanyahu duhet të shkojë në Hagë", tha Mamdani për Neë York Times në një intervistë të botuar të shtunën. "Ai është një kriminel lufte i cili është akuzuar nga Gjykata Ndërkombëtare Penale." Mamdani, kryebashkiaku i parë mysliman i qytetit, ka dënuar me forcë luftën e Izraelit në Gaza, duke i quajtur veprimet e tij një gjenocid. Ai ka kundërshtuar fuqimisht mbështetjen ushtarake dhe financiare të SHBA-së për Izraelin. Ai tha se nuk është e qartë nëse ai ka autoritetin ligjor për të urdhëruar Departamentin e Policisë së Nju Jorkut të arrestojë një udhëheqës të huaj por tha se po zhvillonte biseda me zyrtarët ligjorë të qytetit për këtë çështje. Nëse ai do të realizojë kërcënimin e tij, kjo do ta vendosë atë në kurs përplasjeje të drejtpërdrejtë me Donald Trump, me të cilin ai ka mbajtur marrëdhënie cuditërisht miqësore. Uashingtoni nuk e njeh autoritetin e Gjykatës penale ndërkombëtare dhe Trump vendosi sanksione ndaj saj në shkurt të vitit të kaluar, duke thënë se Gjykata ishte "angazhuar në veprime të paligjshme dhe të pabaza që synonin Amerikën dhe aleatin e saj të ngushtë Izraelin".