Sali Berisha akuzohet për korrupsion nga prokuroria e posaçme jo vetëm për vendimin e qeverisë së tij për privatizimin e ish-kompleksit Partizani. Në dosjen prej 500 faqesh, që ish-Kryeministri i konsideron si sajesa, SPAK referon edhe një episode tjetër të mëvonshëm. SPAK thotë në dosjen që zotëron Top Neës se familja Malltezi ka përfituar tërthorazi pagesa prej mijëra eurosh nga një vendim i qeverisë për dhënie licence për hidrocentrale. Sipas Prokurorisë së Posaçme, historia nis më 17 tetor të vitit 2008, kur ish-kryeministri miraton një VKM për ndërtimin, pronësinë, shfrytëzimin, mirëmbajtjen dhe transferimin e projektit të një hidrocentrali të ri në Ashtë, në Bushat të Shkodrës. Në dhjetor të 2012, bordi i komisionerëve të Entit Rregullator të Energjisë, thuhet në dosje, po me urdhër të Berishës vendos të miratojë marrëveshjen e shitjes së energjisë mes KESH dhe kompaisë që zotëron Ashtën.