Një zjarr masiv ka shkrumbuar më shumë se 20 hektarë pyje me pisha në fshatin Cerilë të Mallakastrës. Zjarri I përmasave të mëdha është përhapur me shpejtësi nga era, teksa sipas përgjegjësit të shërbimit zjarrfikës, Beso Enveri, terreni ka qëné i vështirë dhe jo vetëm zjarrfikësit por edhe banorë të zonës kanë punuar me mjete rrethanore për fikjen e zjarrit. Zjarri ka që në mbrëmjen e së enjtes që është aktivizuar, ndërsa janë përfshirë nga flakët tre banesa, një prej tyre e banueshme por që fatmirësisht nuk ka patur probleme në shëndetin e banorëve. Po ashtu nga zjarri janë shkrumbuar edhe 2 kasolle bagëtish si dhe mbi 1000 rrënjë ullinj. Dëmet nga zjarri janë të konsiderueshme dhe aksioni për shuarjen e flakëve vijon si nga toka ashtu edhe nga ajri. Për shkak të situatës së rënduar, në terren doli edhe Drejtori i Pergjithshem i Agjencise kombetare te Emergjencave Civile Haki Çako. Çako ka urdhëruar që, nëse është e nevojshme, të ndërmerren masa për evakuimin e banorëve të zonës.