Komisioni Europian po punon mbi propozime për të reformuar procesin e zgjerimit, në një moment kur Mali i Zi është shumë afër vijës së finishit për t’u bashkuar me bllokun. Pesë nga gjashtë anëtarët themelues të BE-së kanë propozuar forcimin e mekanizmave mbrojtës për të parandaluar kthimin prapa në zbatimin e parimeve të demokracisë dhe sundimit të ligjit, mësime të nxjerra nga Hungaria e Viktor Orbán-it. Gjermania dhe Franca kanë hedhur ide për integrimin gradual të vendeve kandidate, duke u lejuar të sapoardhurve të shohin përfitimet e hershme të pranimit në BE përpara se të arrijnë anëtarësimin e plotë. “Po reflektojmë se si mund të hartohen masa mbrojtëse brenda traktateve të ardhshme të pranimit. Objektivi është i thjeshtë: të sigurohet që angazhimet e bëra gjatë negociatave, veçanërisht ato të lidhura me 'themeloret’, të mbeten plotësisht në zbatim edhe pas pranimit" – është shprehur një zëdhënës i Komisionit për mediat e huaja.