Ambasada e Republikës së Kosovës në Lubjanë ka kërkuar që të gjithë shtetasit e Kosovës të cilët kanë mbetur pa targa të makinave të tyre, të paraqiten për këshilla dhe asistencë lidhur me kthimin e tyre në vend. “Ambasada e Republikës së Kosovës në Lubjanë njofton të gjithë shtetasit e Republikës së Kosovës që kanë mbetur pa targa të automjeteve që të paraqiten për këshilla dhe asistencë lidhur me kthimin në Kosovë. Nënkuptohet që rastet duhet të paraqiten fillimisht në Policinë e Republikës së Sllovenisë”, thuhet në njoftimin e ambasadës e cila ka vënë në dispozicion edhe një numër emergjent telefoni. Të shtunën në mbrëmje kur u zhvillua ndeshja mes Kosovës dhe Sllovenisë është raportuar se disa prej tifozëve kosovarë që udhëtuan me makinat e tyre, u janë marrë targat. Në shenjë revolte nga humbja e pësuar, tifozët sllovenë raportohet të kenë vjedhur targat e disa makinave me regjistrim të Republikës së Kosovës.